"Mitt fjell og mi frelse":

Kyrkjeprosjekt som forpliktar.

Søndag 7.juni 1997 sa soknemøtet i prestegjeldet ja til skisseprosjektet for den nye Litle-Sotrakyrkja. Vi er glade for at prosessen med nykyrkja no er komen godt i gang. Her er mange positive og lyse trekk i biletet. Mest av alt vil vi likevel trekkje fram at den veksande kyrkjelyden på Litle-Sotra om ikkje så altfor lenge kan sjå fram til eit godt og tenleg kyrkjeanlegg som ramme for si tilbeding, tru og teneste.

Bibelsk visjon.

Ekstra spanande meiner vi det er at skisseprosjektet ber bod om ikkje lite av ein bibelsk visjon. T.d. kan vi vise til tanken om nykyrkja som ein borg.

Då tenkjer vi sjølvsagt fort på bibelske salmar som Sal.46, 62 og 71, men óg på mange andre stader i Bibelen. Det er verkeleg fascinerande å meditere over at eit så sentralt bibelsk motiv skal vere ein hovudtanke i den nye kyrkja i Fjell prestegjeld. Slå gjerne opp desse tekstane sjølv, og lat deg fange inn av borg-motivet og andre som heng tett saman med det, som Livsens Kjelde, og Det Nye Jerusalem.(46,5)

Men viktigst er nok at når vi mediterer over desse sentrale bibelske motiv, kjem vi ikkje unna eit møte med Den Heilage Gud: "...skjøn at eg er Gud!"(46,11).

Difor forpliktar det nye kyrkjeprosjektet oss veldig.

Og då reiser ein sentral problemstilling seg:

Når vi alt på teiknebrettet finn så mykje av bibelske kjenneteikn alt i bygget, burde vi vel alt no tenke bevisst på kva for kjenneteikn livet i kyrkjebygget skal ha?

"Kyrkja sine kjenneteikn."

Vi finn ein god hjelp i kyrkjefornyaren Martin Luther sine ord om "Kyrkja sine kjenneteikn" frå 1539.

http://www.stellamaris.no/7kjt.htm

Her går Luther først gjennom kva kyrkja er for noko(samfunnet av dei heilage, eit heilagt gudsfolk, osb.), og så kjem han med sju kjenneteikn på kyrkja. Det er desse:

Guds Ord.

Dåpens Sakrament.

Nattverdens Sakrament.

Binde-og Løysemakta.

Kyrkja sitt Embete.

Gudsteneste og Bøn.

Kross og Liding.

Her er det mykje å seie meir om.

Men alt i dag kan vi, og må vi prøve oss sjølve, ikkje bare på Litle-Sotra, men i heile Fjell:

Har vi desse 7 kjenneteikn på Den Heilage Kristne Kyrkja i sin fullnad hos oss?

Det er ikkje vårt kall å svare her. Bare gje spørsmålet vidare til prøving. Og gje nokre føresetnader for at vi kan svare ja:

Guds Ord, Lov og Evangelium må forkynnast til tukt og trøyst.

Dei Heilage Sakramenta må brukast etter Kristi innstifting.

Skriftemålet må takast i bruk.

Prestetenesta ut i felten. Sjelesorg som møte med Herren. Trøyst i striden. Kall til omvending.

Bønetenesta må prioriterast, i lønkammeret, i heimen, og i kyrkjelyden.

Og sist men ikkje minst:

Kyrkjelydane i Fjell må våge å vere kyrkje, og bere den Heilage Krossen.

Påny og påny må vi som kyrkje i dag vere viljuge til å justere kursen i tilhøve til det som er gjeve oss i Skrift, Vedkjenning, og frå dei som har gått foran.

Det er vekkjing og nytt liv det handlar om!

For borg-kyrkja på Litle-Sotra forpliktar:

"Ver still for Gud, mi sjel!

Frå han kjem mi von.

Einast han er mitt fjell(!) og mi frelse;

han er mi borg,

eg skal ikkje rikkast."(Sal.62, 6-7)

Svenn Martinsen.