Til Lammets måltid får vi gå.

”Til Lammets måltid får vi gå

Med frelsens hvite kledning på

Igjennom havet gikk vår gang,

la Kristus hylles med vår sang!”

(NoS 138,1)

Med den gamle 500-talssalmen ønskjer eg dykk vel møtt til gudstenestene i påskehøgtida. Som døypte og truande skal vi saman få lovsynge Kristus, Frelsaren og Sigerherren, og få ta del i Lammets måltid.

Og vi skal få gjere det med ”Den store Lovsongen”-Øygardsliturgien-som sokneråda har vedteke brukt i prestegjeldet ut 2007.

Bakgrunnen er ein ny liturgirevisjon som er igongsett i Den norske kyrkja, der lokale prestegjeld er inviterte til å ta del. Revisjonen skal denne gongen ikkje vere så omfattande som i 1977, men gje meir høve til variasjon.

Vi tok utfordringa, for dette gav oss eit godt høve til å setje saman ein lokal gudstenesteordning, som kan skape vår eigen merkevare og identitet. fast i struktur, men fleksibel i form. Vi har óg opna for fleksibel bruk av tilgjengelege salmebøker, med NoS og Songboka i spissen. Dette er viktig for å samle Guds Folk, i møtet med born, unge og unge heimar, og i kyrkjesituasjonen.

Det er samla stoff frå fleire tradisjonar:

• Søndagsskule
• Bedehus
• Karismatikk
• Klassisk lutherdom
• Økumeniske samanhengar
• Oldkyrkja
• Eksisterande liturgiar frå 1920, og 1977/1983.

Bruk av band, moderne hjelpemiddel og stor deltaking av born, unge og andre interesserte er eit mål. Alt skal vere bygd på Skrifta og dei oldkyrkjelege og lutherske vedkjenningane. Ta gjerne ein titt på det stoffet vi har laga så langt og som ligg på nettet:

Den Store Lovsongen: Fullversjon, pdf.

Den Store Lovsongen: Utskriven ordning, pdf

Den Store Lovsongen: Versjon Kyrkjelyd

Den Store Lovsongen: Alternative Forbøner, pdf

Den Store Lovsongen og Kyrkja sin tradisjon,pdf

Prosjektet fell saman med ei stor oppgradering av kyrkjene våre. Kom og ver med. Gje innspel i prøveperioden for å få resultatet best mogleg. Og, velkomne då, til påskefeiring i Øygardskyrkjelydane:

”For Kristus er vårt påskelam,

det offer som ble båret fram.

Det er hans eget, sanne kjød

Som rekkes oss i usyrt brød.

Guds Lam, du sanne livets brød,

Som helveds makt og velde brøt!

Forløst til liv fra dødens tvang

Går folket ut med jubelsang.”

(NoS 138,4-5)

svennam@hotmail.com