Porno på TV og Internett:

Ein bodskap frå Sacramento

Den amerikanske pinsevennpastoren David Wilkerson, for oss mest kjend frå boka “Narkomaner og storbygjenger”(”The cross and the switchblade” fekk på 80-talet ein profetisk bodskap som har fått namnet “Wall of Fire”.(Ein mur av flammer)

Mens ein stundom kan stille spørsmål om slike bodskap i ymse kyrkjelege samanhengar er ekte, er det liten tvil om at dette i hovudsak er det, ettersom Wilkerson ber fram eit stykke av Guds Ord slik at det slår inn i ein konkret situasjon, som no i 2005, er velkjend.

Wilkerson fortel at han var på eit motell i Sacramento, California,  og skrudde på TV etter eit vekkjingsmøte. I staden for siste nytt traff han på ein musikkvideo, som på den tida sjølvsagt var nokså nymotens. Det var likevel det demoniske innhaldet med seksuelle overtonar som pastoren merka seg.

Han fortel at han bøygde kne i bøn, samstundes som bølgjer av tidlegare inntrykk av forfall frå media og samfunn kom over han. Det var sex på avvegar, ekteskapsbrot, vald, drap, narkotika, svindel, satanisme og gudløyse.

Men Heilaganden kom over han med ein bodskap om trøyst, som gav lys i mørkret:

“Herren skal frelse deg og borna dine og heile folket sitt ved å være ein mur av flammar rundt dykk.”

Wilkerson fortel at han så vart mint på Sak.2,9:

“Sjølv skal eg vera ein eldmur kring byen,

lyder ordet frå Herren,

og midt i han vil eg syna min herlegdom.”

Gud ønskjer eit heilag folk, og å utruste sine til heilag strid i tida som kjem. Når synda aukar, skal dei truande finne vern bak Guds mur av flammer.

Når det gjeld resten av denne bodskapen får eg vise til originalteksten, som er lett å finne på Internett, sjå peikarane under.

Lat meg no få fokusere på ein spesiell del av Wilkerson sin Sacramento-profeti, som tangerer noko eg for min del i lang tid har vore mint å skrive om: Umoral i moderne media. Er det ikkje nokså taust frå kyrkja om dette spørsmålet? Dessutan var nok prestane flinkare til å påtale offentleg umoral tidlegare.

Porno på satellitt-TV

Som de veit er eg særs interessert i kringkasting, særleg gjeld dette radio, og heilt frå eg var gut har eg likt å skru frå frekvens til frekvens for å sjå kva eg kunne høyre.

For tre år sidan fekk eg høve til å investere i satellitt-utstyr, og starta då å utforske eit nytt kringkastingsband, frå 10,7-12,7 GHz.

Frå mange radio-og TV-sendarar plassert m.a. på satellittane Thor, Sirius, Hotbird og Astra over Ekvator, tek me her i landet inn krystallklar lyd og bilete frå mange hundre stasjonar.

Det er som ein ny versjon av kortbølgja.

Her er verdfulle tilbod som nyhende frå Sky News og CNN, og kristne program frå EWTN og God Channel.

Men mens kortbølgja hadde problem med støy av ymse slag, må vi no peike på ein ny sort støy i form av somme satellittstasjonar og –programtilbod.

M.a. i dei to store skandinaviske satellitt-”paraplyane” Viasat(eigd av Modern Times Group)[1] og Canal Digital(eigd av statseigde Telenor)[2] er det i dei dyraste abonnementpakkene sjåarane kan kjøpe stasjonar som sender pornografiske filmar ein del av dagen . Det er verd å merke seg at elektronikkjedene ofte sel mottakingsutstyr for ei krone mot at ein nettopp teiknar abonnement på desse pakkene. Men då er ein i lomma på den moderne mediekapitalismen. Andre stasjonar i Europa sender slikt materiale kontinuerleg. Her óg må ein kjøpe dyre kodekort.

Det fins óg opne kanalar som ser ut til å m.a sikte på å få folk til å kjøpe slike mottakingskort samstundes som ein vil påvirke folk til å bruke mange pengar på telefonsex og prostitusjon. Her ser óg ut til å være koblingar med gambling og spåkoneverksemd.

Vi ser her ein turbokapitalisme i media som tydelegvis er heilt ute av styring.

Porno på internett

Om mogleg endå verre står det til på Internett.

”Cyberspace” er som ein global by. Med eit bilete: Her er mange fine gater og hus, men óg bakgater og etablissement ein bør halda seg borte frå.

Problemet er likevel at medan ein tenkjer seg vel om før ein går i mørke bakgater i ein verkeleg by, er tilsvarande på internett bare eit ”klikk” unna.

Den frie flyten av informasjon i ”cyberspace” har ført til ei oppblomstring av ugras som det skal bli vanskeleg å kontrollere, for ikkje å seie: bli kvitt.

Dei som har greie på det seier at den kommersielle sexindustrien sitt nedslag på nettet er påtakeleg, med pornografiske nettstader i hundretusenvis, men óg har ymse slag undergrunnskultur som før kanskje kunne finnast nettopp i ein butikk i ei bakgate no kome bare “eit klikk” unna.

I fjor haust kom Nye Kripos og Telenor på banen med eit særs prisverdig tiltak. Dei som går inn på internettsider av det slaget som vert ramma av norsk lov vert møtt av ein plakat som venleg, men tydeleg påtaler tilhøvet.

Etterkvart er det óg lettare å ha oppsyn med internettsøk etter slikt materiale.

Kyrkja må seie seg glad for at demoniske krefter kan haldast i sjakk. Men samstundes må eg få påpeike at det må vere kyrkja sitt syn at “lovleg” pornografi heller ikkje må få breie seg.

St.Georg og dragen

Eg skriv dette til dykk i fastetida. Ved messa i Hjelme på 1. s i faste den 13.februar forkynte eg frå Guds Ord om at Kristus er sterkare enn djevelen frå Matt.4.

Ja, Kristus er vår sigerherre. Og, for å seie det med ordet frå Sacramento: Han er ein mur av heilagdom rundt oss, for at vi som Hans Folk óg skal vere heilage. Her er det mykje trøyst og utrustning! Gud er ein heilag Gud!

Og helgenskaren og dei truande som har gått føreåt og no er ute av den heilage striden og no er heime hjå Herren, er ein stor trøyst og styrke for oss.

Det går verkeleg an å sigre over freistingar, synd og den vonde.

No er vi etter påske. 23.april er helgendagen for St.Georg(Jørgen). Han var ein riddar frå Kappadokia i Tyrkia. Om han vert det fortalt at han “angrep en drage som terroriserte en landsby i Libya, stakk den med sin lanse og førte den som fange inn til byen, som om den var fullstendig tam. Georg ba folket om ikke å være redde. Hvis de ville tro på Jesus Kristus og bli døpt, ville han befri dem fra uhyret. Kongen og folket gikk med på det, Georg drepte dragen og15.000 mennesker ble døpt. Georg ville ikke ha noen belønning, men ba kongen om å skaffe kirker, ære prester og vise medfølelse med de fattige.”

Eit kall til nettriddarteneste

Kanskje vi kan be fram ei ny “nettriddar”teneste i Kyrkja, at nye Georg-typar kan stå fram, som kan stå opp mot den dragen som terroriserer “medielandsbyen” vår frå “space” og “cyberspace”.

“Ta Guds fulle rustning på, så de kan stå dykk mot djevelens lumske åtak. For vi har ikkje strid mot kjøt og blod, men mot makter og herredøme, mot verdsens herrar i dette mørkret, mot vondskapens åndehær i himmelrømda.”  Ef.6,11-12

Eit særs aktuelt Guds Ord. Men lat oss ikkje åndeleggjere ein djupt alvorleg situasjon.

Eg trur at under den moderne mediekapitalismen er det bare marknadsmakt som gjer inntrykk, nemleg at distributørar av dårleg materiale ikkje får brukarar og at ein offentleg held fram det forkastelege i deira verksemd. Dei er medskuldige i at naudsynlege grenser vert nedbrotne og at synda sitt ugras aukar. Difor nokre få framlegg til “strakstiltak”. Det er ikkje nok at den einskilde ”feier for sin dør.” Dette er viktig nok i seg sjølv, men stoppar det her, gøymer vi lett hovudet i sanden. Difor:

1. Send e-post og brev om tilhøva i satellittkringkasting og på Internett til Familie og Medier(som alt har eit engasjement), mediepolitikarar i Stortinget, politisk leiing i Kulturdepartementet, og Medietilsynet. Truleg er internasjonalt samarbeid naudsynt.

2. Sjølv om eg kan erte på meg fotballfans som abonnerer hos dei nemnde “satellittparaplyene”: Abonner helst ikkje på dei dyraste pakkene dei tilbyr.

3. Send epost og brev til deira respektive kundeservice og protestér på at dei sender pornografi.

4. Send epost og brev til internettleverandørane og protestér på at dei formidlar pornografi. Det burde vere mogleg for nettsurfarar å ”anmelde” suspekte, men ”lovlege” nettstader dei kjem over t.d. i søkjelister i Google.com anonymt til eit sentralt register og at desse sidene så kan verte blokkert av styresmaktene.

5. Gå ikkje inn på internettsider som formidlar pornografi, om det aldri så mykje skulle vere “lovleg.” For distributørane er det bare ein ting som tel: For jo meir “treff” dei får, jo meir tener dei.

6. Ta ikkje vare på noko slags pornografisk materiale. Har du noko slikt, kast det. Det kan samanliknast med avgudsbilete! 2.Mos.20,4-6.

7. Gjennom whois.com er det mogleg å finne ut kven som står bak internettsider, og på det viset “røykja dei ut” og stille dei til ansvar. Men dette vert ikkje ufarleg. Det er sterke krefter i sving.

Eit siste ord

Pastor David Wilkerson avsluttar Sacramento-profetien med eit anna Sakarja-ord:

“Så seier Herren, Allhærs Gud:

Går du på mine vegar og rettar deg etter det eg har fastsett, skal du få styra mitt hus og vakta mine føregardar,...” (Sak.3,7)

Dei som lyder Herrens vilje skal få oppleve at Guds eldmur er eit vern for dei som i frykt for Herren lyder Hans vilje.

Sjå til Herren i dag, seier han og be om at at Hans mur av flammar óg må verna deg og dine. Vent at Han skal syne sin herlegdom! Be óg for borna dine, at dei må ha det same vernet. Dette er det som Heilaganden har synt meg.”

svennam@hotmail.com 

Adresser for vidare orientering og kjelder:

http://www.fom.no

http://www.lyngsat.com

http://www.viasat.no

http://www.canaldigital.no

http://www.medietilsynet.no

http://www.katolsk.no/biografi/georg.htm

http://www.churchsaints.btinternet.co.uk/stgeorge/stgeorge.htm

http://www.tscpulpitseries.org/english/indexchr.html

http://www.tscpulpitseries.org/english/undated/tswall.html

---

[1] Sjå korrespondanse med Viasat her:

http://www.kyrkja.net/viasat.htm

[2] Sjå korrespondanse med Canal Digital og Kyrkje-og Kulturdepartementet her:

http://www.stellamaris.no/kkd.htm

I denne pakka, og på vanleg TV i mestedelen av landet finn ein óg TV Norge, som annonserer for pornografi på tekst-TV sidene sine. Sjå korrespondanse med BTV som har konsesjon i Hordaland(eigd av Bergens Tidende) sin redaktør her:

http://www.stellamaris.no/tvn.htm